Am 11. Oktober samma mit unserm Trachtenverein Egling auf’n Ausflug nach Mittenwald aufbrochn.
Nach da Bergfahrt mit da Karwendelbahn hamma a recht interessante Führung in da höchstgelegenen Brauerei Deutschlands ghabt. Danach gab’s a gscheids Mittagsessen im Restaurant an da Bergstation – mit an traumhaften Blick über Mittenwald und d’Berg rundum.

Gegen oans san ma dann wieder obi in d’Stadt und ham de goldene Herbstsun bei Kaffee und Kuchen gnießn derfn.
Am Abend samma no im Gasthaus Stern eingekehrt, wo ma mit vui Gmütlichkeit, guada Musi und a wengerl Tanz’n den Tag ausklingen ham lassn.

A herzlichs Vergelt’s Gott an’n Veitl Toni und d’Oimhittnmusi – mit Gitarre und Quetschn ham’s für a richtig guade Stimmung g’sorgt!
Schee war’s, dass so vui von eich dabei warn – so machts vui Freud!

Am 6. September san ma mit unserer Jugend auf nach Benediktbeuern gfahrn – und des war a richtig scheener Tag!
Nach am kloana Spaziergang durchs Kloster Benediktbeuern ham ma uns auf’n Naturpfad gfreit. D’Kinder ham dort allerhand entdeckt – Vögel beobachtet, durchs Moor gstapft und vui glernt und glacht dabei.

Am Abend san ma wieda zruck nach Egling gfahrn, wo’s no a guads Eis gab. Und wie’s dann dunkel worn is, ham ma’s uns am Feuer gmiatlich gmocht – mit frischem Stockbrot und vui Gaudi.

Schee, dass so vui dabei worn – des war a Tag, den ma so schnell nimma vergisst!

Des heurige Gaufest in Penzberg war a wahre Freud! Unser Verein war guad vertreten und ma hat glei gspürt, wia schee der Zusammenhalt is.
Nach am feierlichen Kirchenzug und da stimmungsvollen Messe san ma im Festzug marschiert. Unsre Jugend is danoch im Festzelt auftretn und am End ham unsre Aktiven Platller no gscheid aufdraht.

Bei am guaden Weißbier und gmiatlicher Danzlmusi is da Tag dann so richtig schee ausgklunga.